董建華唔經唔覺做咗五年特首，話咁快又話連任。過去五年佢做過啲乜，大家未必會記得，反而佢嘅「七．十一」工作時間，同日比日白嘅平頭裝，就相當深入民心。
老董嘅平頭裝近日出現危機。據聞同佢剪咗幾十年頭髮嘅徐師傅，近日大歎生意難做。雖然熟客仔中不乏達官貴人，但有錢唔等於唔貪便宜，唔少人近日都跟潮流，北上理髮。喺深圳剪個頭，可自備洗頭水，十蚊搞掂。東莞重平，五蚊有得傾。咁徐師傅每次收開二、三百，又點同人爭呢！
選髮型費思量
如果徐師傅真係唔做，咁特首個頭點算好呢？佢老人家剪頭髮嘅習慣都幾難張就，通常晨咁早未返工之前，就要人去佢屋企剪，一路剪就一路睇報紙同文件，加上頭髮又多又硬，普通嘅「鮑魚刷」好易起晒角，唔好睇。
咁難搞，八方建議特首不如索性放棄保留咗三十幾年嘅髮型，趁機改改形象。譬如剪番個碧咸頭，可能會顯得活力充沛啲；又或者剪F4成員「仔仔」個乖仔look，肯定會多好多女fans；再唔係學吓日本首相小泉純一郎，長而鬈曲嘅頭髮，真係諗起都……
最貼切嘅可能係梳任賢齊個髮型。「小齊」首《心太軟》，講中晒老董施政議而不決嘅脾性。
傳真︰2623-9278
電郵︰