雖然今日光州市舉行第一場世界盃決賽周賽事，可惜市內世界盃氣氛認真麻麻，似乎真係要等中國球迷進駐先至可以帶來刺激作用，商舖「食粥食飯」，當然要睇中國萬千球迷。
為迎接會喺光州市進行比賽的四支世盃球隊，市中心已特別將四條街易名為「中國街」、「哥斯達黎加街」等，目的希望令球迷更加融入世界盃熱潮。但光州市政府搞世界盃似乎唔多全面，淨係掛橫額，搵多張海報都唔係咁易。反而部份商舖就好有生意頭腦，識得掛番支中國國旗喺門口，吸引到時抵埗的中國球迷前來消費，更標明會有折扣優惠。話晒光州係鄉村地方，要再次吸引大批遊客都唔知要等到幾時，有機會當然唔放過。
講番今屆世界盃，有無氣氛可謂見仁見智，喺市中心同斯洛文尼亞嘅球迷傾開，以前喺歐洲舉行世界盃，幾個鐘頭前球迷已經喺市中心開party，但係光州就十分清靜，真係唔多好習慣；只有自己一團人大叫大嚷，當地人就冇乜反應。不過，對於當地人來講，喺球場外同幾個外國球迷影相、唱歌，已經好突破，始終鄉下人，冇咁開放。