利物浦前日話成功簽咗塞內加爾前鋒迪奧夫，但迪奧夫𠵱家效力緊嘅球會朗斯，噚日就話交易重未搞掂。點解會咁？計我求大俠話，九成係朗斯想等迪奧夫喺今屆世界盃開齋之後，將個價叫高啲。
迪奧夫喺揭幕戰對法國嘅表現獲得外界一致好評。據小道消息話，家陣佢已值成一千萬鎊（成一億幾港紙），如果喺之後幾場有波入嘅話，睇怕唔止值呢個價，隨時會去到千四、五萬鎊都唔定。
朗斯既然都諗住賣走迪奧夫，當然係想愈賣得高價愈好，所以佢哋如果真係坐地起價，站在做生意嘅立場嚟講，實在係無可厚非。所謂「一個願打、一個願捱」，若然利物浦覺得擺明係俾人掠水，咁咪米鬼要迪奧夫囉！
德國前晚數沙地八比○後，佢哋龍門簡尼揚言話德國可以攞冠軍。老實講，沙地有幾多料大家心照啦，所以數倒佢哋都唔可以代表啲乜。況且喺嗰八球之中，有五球係用頭頂入，如果淨係靠身高都贏到世界盃，咁美國搵啲NBA球員嚟打咪實贏梗！
喀麥隆見德國數沙地數得咁過癮，都話要數埋一份，喺下場數沙地。但係唔好話我求大俠唔提醒佢哋，事關沙地喺對上兩屆世界盃對住非洲隊表現好好，贏摩洛哥打和南非，所以佢哋對住唔會好似德國咁有高空攻勢嘅喀麥隆，未必一定輸。
尼日利亞球員喺噚日對阿根廷場波，着件螢光綠而冧巴同名係白色嘅波衫出嚟比賽，睇到我求大俠眼到矇埋。事關<