大摩指數調校比重，基金上禮拜五搞埋啲手尾，例如買長實（001）、賣和黃（013），結果長實升1.25元，和黃跌0.25元。「調整」成份股工作完成，個市調整亦已差唔多，恒指由高位碌落嚟，已有700點，而9RSI亦由81落到30；由去年911至今，9RSI只有今年1月同2月試過兩次低過30。港股就嚟升番，1個搵銀直接做法係揸恒指Call輪，對象係9045。
9045溢價已低，槓桿率好高，跟恒指變化跟得好貼。上禮拜，5日內恒指跌2.1%，9045跌夠21%，啱啱係恒指跌幅嘅10倍。今個禮拜，恒指有機會升番3%，隻輪就有機會升番30%。
9045差唔多重有兩個月玩，現價22.8仙，溢價1.5%，槓桿率11倍，交投活躍。揸9045贏輸都快見功，唔怕悶親。
最近有隻公司新輪登場，就係德信科技（1228）隻1165。德信生產電子產品，先一排1送2紅股及送輪，擺明想做嘢。1165現價16仙，24個月後到期，溢價16.7%，槓桿率3倍。公司新輪登場，通常都有保溫期，1165有得諗。
章 盛