政府修訂賭博條例，禁止境外賭博；公益金度橋籌款，搞估波抽獎，被人批評為變相賭波，呢條好橋於是流產；尹志強（昔日球星，今日係上市公司主席）上電視台講馬，被強烈勸諭唔好講及「馬膽」、「拖腳」、「幾隻複式」呢類字眼，皆因節目在家庭時間（晚上十一時前）播出，TELA唔會容忍一啲涉及、可能涉及賭馬嘅字眼，以免兒童受到不良影響喎。
講馬唔畀講「馬膽」，可見特區特府之假惺惺、偽道德嘅一面；但政府如此僵硬，亦因為社會還有一派假道學嘅強硬聲音，久唔久就找政府麻煩，啲官生性怕事，自然被迫跟埋做偽道德，你話香港有乜前途？大家只知弄虛作假，解決問題唔照顧現實，用把口講道德，你話有乜前途？
《南華早報》專欄作家JakevanderKamp講得好，教會干涉賭波政策，以道德為藉口，其實公共政策係世俗政府之事，講道德乃係上帝教會之事，凡夫俗子講賭波，教堂內宣諭賭博不道德，先至係正路也。
賓架P有一次問左丁山：「啲傳媒老細有冇婚外情、桃色事件或者叫雞？」為何有此一問？
賓架P話：「傳媒老細應該算係公眾人物，佢哋啲屬下記者掛住爆名人私隱，重要扮大義凜然，以公眾人物嘅私隱關乎公眾利益為藉口。咁樣傳媒老闆嘅婚外情，onenightstand都應該關乎公眾利益啫。」咁就明白佢講乜嘞。回答佢嘅原來問題，答案好容易：「啲老細唔係聖人，不過點會有手下敢爆呀！」