一場波有兩個唔同讓球嘅亞洲盤畀你選擇，等你唔使左諗右諗，好過要等臨場變盤。而今日兩大熱門意大利同巴西出場，應該點捧佢哋場好呢？
據知喺𠵱家世界盃有啲賭波公司推出咗「兩頭蛇」新玩法。係一場波入面會開夠兩個盤口出嚟，好似噚日英瑞之戰，就有賭波公司開出咗英格蘭讓半球，同埋英格蘭讓平手/半球兩個亞洲盤。
賭波公司就係睇準呢班客仔嘅心態，整多個盤口畀你諗吓，當然水位係會有高低之分啦，但係合乎心水之下，嗰種覺得穩贏嘅信心，你又點會介意個盤低水呢？所以不妨睇多幾間公司嘅盤口參考吓，睇吓有冇你嘅「筍盤」！
今日終於輪到大熱門嘅意大利，同埋足球王國巴西出場，莊家們就視佢哋呢兩場首場分組賽為今屆搵食良機。
意大利今場對手弱，應該可以全取三分；不過個盤就唔係幾抵玩，呢隊波通常贏親都係一、兩球上落，本報眾名家都認為估波膽贏一比○及二比○，好過博上盤！
巴西嘅賽事一直都特別受到本地賭客歡迎，今屆佢哋更加有「3R」，而且對手土耳其又啱啱係我哋個回歸盃表現麻麻，難怪街外已經有盤去到巴西讓球半。個人認為「3R」狀態重未知點，係要玩上盤捧巴西嘅話，玩少少好喇！ 文：華度