趙飛雲唔算標準球迷，但由1970年已開始睇世界盃，今屆無綫及亞視攞唔到現場直播，相信唔少人都有啲失望，而攞咗獨家直播權嘅有線寬頻（1097）早排股價急升後，近期股價升後整固，上周五收5.65元，險守50日線（現於5.60元）之上。有線技術走勢平平，加埋現價往績PE68倍，預測亦高達34倍，相信大部份利好因素已反映，現價唔多值得追捧。
至於其他具世界盃概念嘅股份，例如青島啤酒（168）5月初急升至3.375元高位後，其後3次試頂皆未能確認突破，上周險守20日線（現處約3.225元），如果跌破及3.10元進一步失守，則可能跌勢轉急，有機下試50日線2.80元。總之，世界盃不妨盡情狂睇，但世界盃概念股就唔好亂追。
上周五美股個別發展，杜指升13點，但納指則跌近1%，收1615。美元持續弱勢有好有壞，如果有部份資金繼續流入港股，會對恒指有一定支持。不過，近排市場利淡消息較多，造淡容易過造好。
趙飛雲先前覺得印巴衝突唔會係大問題，但近期局勢轉趨緊張，實在不可不防。上星期睇咗套太平洋戰爭紀錄片，講述日本受原子彈轟炸的慘況及影響，令趙飛雲有好大感觸，亦想印巴兩國領導人一同坐低睇吓套片，了解一旦發生核戰嘅後果。
趙飛雲