四年一度嘅世界盃開鑼，亞Mark公私兩忙真係好唔得閒，平日要響車行中四處刮料之餘，重要兼顧埋世界盃各組戰況，真係有點顧此失彼嘅感覺㗎！昨日亞Mark睇報紙，話沙田賽馬日入場馬迷銳減嘅消息，查實早已係意料之事，事關本地好多汽車代理商為咗避重就輕嘅緣故，都盡量將啲大Function大Event押後，又或者搵張世界盃賽程表，好似嫁女咁夾吓時辰八字，至決定搞Event嘅時間。就好似福特咁，早前提過話佢哋會響灣仔開新Showroom，亞Mark打聽到佢哋嘅開張日期，大抵會係今個月下旬，皆因係世界盃準決賽時段，賽程冇咁密嘅緣故啩！而最受車迷關注嘅，相信會係佢哋新一代福特Fiesta會否趕及前來助興呢？各位鍾愛福特汽車嘅Fans，就要拭目以待喇！