何婉盈同傅明憲都係愛狗之人，前晚佢兩個分別帶埋愛犬去上水金地燒烤場參與《狗狗Resort仲夏夜》活動。婉盈同埋老公帶住五隻狗亮相，其中有金毛尋回犬、西施同狼狗等。何婉盈話今年馬年，佢有隻狗犯太歲，所以去廟幫佢攝太歲，重掛咗道平安符喺隻狗條頸度喎，真係名副其實一名狗癡。
講到養狗同生BB嘅問題，何婉盈話養狗唔會影響生仔，只要佢唔好偏心，唔好畀啲狗覺得有咗BB之後，被忽略咁就得。
傅明憲就獨自帶埋兩隻北京狗出現，佢話佢老公怕一次過見咁多狗，所以唔敢陪佢嚟。佢話都想生BB，而且狗同小朋友可以共處，等小朋友習慣同啲小動物一齊生活，重可以培養佢哋有責任感喎。
前晚呢個狗展活動係幫亞洲動物協會籌款，每位入場人士要畀二百蚊入場費，最後有一百人入場，籌咗二萬幾蚊，都算唔錯。
楊采妮攞住佢以前拍戲賺咗嗰啲錢，同男友邱韶智合作做生意，但蝕晒老本之餘重爭落唔少債，所以近來一直有消息話佢會復出。馮仁昭知道楊采妮喺娛樂圈重好搶手，徐克、杜琪峰、王家衞同馬楚成呢四位名導演都想搵佢合作拍戲，楊采妮雖然現時對做生意嘅興趣大過拍戲，但因為經濟問題，復出嘅機會都好大。
陳啟泰噚日喺澳門睇亞視盃賽馬，佢話同老婆啱啱去完泰國返嚟，喺嗰邊游吓水同唞吓，玩得好開心。
陳啟泰重透露自己將會喺下個月主持新一輯嘅《百萬富翁》，而八月會為新碟錄音，九月就會推出新唱片。
葉蘊儀個前夫最近喺某周刊公開數葉蘊儀，馮仁昭覺得分手就算做唔成朋友，都唔使反轉豬肚就係屎。上個禮拜三，李麗珍約咗葉蘊儀同埋一個姓周嘅風水師傅喺中環飲嘢，傾吓風水問題，臨走時俾某周刊嘅記者影咗相。馮仁昭都識得個風水師傅，佢同馮仁昭呻話記者追住佢不停影相，佢擔心啲周刊又唔知會點寫？
田蕊妮噚日去咗澳門，出席亞視賽馬盃，佢着咗件性感露背裝，十分惹火。不過，田蕊妮就對記者話自己呢排成日病，先前哮喘同傷風打孖嚟，田蕊妮話：「𠵱家我哮喘好番，但傷風就未好。」唔知係咪有病嘅原因，所以佢噚日都冇乜心機去落注。
陳煒噚日着低胸衫去澳門出席亞視盃，佢同馮仁昭講話男友送咗隻卡地亞戒指畀佢。問陳煒呢隻係咪訂婚戒指？佢話因為佢鍾意，所以男友就送畀佢！陳煒又喺陽春拍完劇集《乘勝追擊》返嚟，查call台，先知錯過咗兩個廣告，一個係瘦身，一個係樓盤，損失咗約六位數字。
張衞健早排喺大陸拍《齊天大聖孫悟空》，今次健仔除咗做主角之外，亦搵咗好多圈中老友客串，重做埋好多幕後嘅工作。可能因為咁，同出品人李世雄喺合作上面出現咗好多問題，大家都唔係咁開心。所以再合作嘅機會好微。遲啲健仔會同黃百鳴合作拍電視劇《如來神掌》，而李世雄亦會開一套大製作《西楚霸王》。
黎明（Leon）噚日六點半由兩個助手陪同下出現機場，大約有三十幾個歌迷接機，但Leon就冇回答記者佢喺邊度返嚟。不過，Leon都好追得上世盃熱潮，見佢手上面揸住個足球型嘅風扇仔，一路行一路吹，佢都不知幾enjoy，而Leon今次亦冇喺禁區上車。