創業板新股健諾國際生化（8031）今日上市，雖然近排創業板新股，大部份表現都乏善足陳，令人難提起興趣，但小初對呢隻股就另眼相看，因為搞手係金魚缸內嘅大哥大，佢一出手會有大把人幫手。
健諾今次係以每股0.65元，發行1.2億股，集資額成7800萬元，唔係一般集資額千零萬，重要回水幾成嘅創業板股仔。
講真句，小初對健諾嘅人造腸研發技術生化業務，完全不甚了解。不過，搞手大哥大「泰哥」以往搞嘅千里眼（8051）表現驚人，所以健諾招股時，小初已經睇到實一實，結果真係一如所料，公開發售部份超額認購142倍，而配售部份亦有4.5倍認購。小初都入咗「大飛」認購，但係分得唔多，相信係太多捧場客。
由於隻股有公開招股部份，所以經紀陳估計，今朝隻股可能會高開，等有貨者如小初之流沽一轉，然後至見真章。
慕容小初