陳冠希（Edison）早排為新歌《有幾壞》排舞，大sell勁歌熱舞。本來Edison都好享受一邊跳舞一邊唱歌嘅感覺，話好high喎。點知Edison日前再為呢隻新歌拍MV時，竟然搞到佢對腳發軟蹄，喺廁所一坐不起！
話說Edison拍MV嘅前一日出咗埠做嘢，捱咗一晚通宵，佢第二日返香港拍MV，本來已經攰到雙眼無神兼腳軟軟。但Edison依然頂硬上，投入跳舞之外，重要做埋拋媚眼嘅發電表情，佢惟有用眼藥水滋潤下對眼啦。
拍完成個MV，原來Edison總共跳咗隻舞五十幾次，佢攰到唔識講嘢兼發軟蹄，返到屋企去廁所，直情坐咗喺個馬桶度就唔願起身，Edison話：「從來都唔知馬桶係咁好坐，如果個廁所係踎廁，我實一路去一路會跌低咗，真係未試過咁攰㗎。」