愛衫如命的章小蕙，把穿衣的風格和愛好分為四個階段。由曾經對童話故事女主角與落難貴族的造型極度沉迷，到今天她最鍾愛的是自由自在配搭，而藍色最能代表自由，這次她便以其店內一系列的藍色新裝，演繹自由的美態。
章小蕙（Teresa）對時裝的鍾愛和癡迷，人所共知。對於自己的穿衣風格與態度，她表示可分為四個階段，每個階段都與她當時的生活環境及心態有關。
Teresa說：「第一個階段係未嫁嗰陣，嗰時好鍾意將自己扮到成個童話故事裏面嘅公主咁，最鍾意着RalphLauren同RomeoGigli嘅作品。第二個階段就係啱啱嫁嗰陣，個人開始鍾意扮得隆重又有型，嗰時最鍾情Chanel嘅jacket襯牛仔褲，既型又有女人味。」
Teresa續說：「到咗第三個階段，就係離婚嗰陣。嗰時面對最大壓力，但係心裏面依然好想尋找浪漫，當時好hit嘅Voyage就最符合我當時嘅心情，完全係一個落難貴族嘅造型，有啲破爛，但心底裏仍然堅信浪漫嘅存在。
「到咗現時嘅階段，自己創業做生意，見嘅嘢更加多，心態亦更從容隨意。𠵱家我最鍾意自由自在嘅配搭，鍾意着乜就着乜，完全冇規限。」
Teresa今次以藍色作主題的新裝配搭，將其現時的自由心態展現出來。而其店內的這批新裝，便包括她早年鍾愛的品牌RomeoGigli。
章小蕙當年有一句金句：「飯可以唔食，衫唔可以唔買。」問她時至今天，對這個論點是否仍然堅持？章小蕙說：「當然啦，呢句說話對於一個鍾意衫嘅人嚟講，係幾時都成立嘅。」
問章小蕙現在還是否仍像當年半夜對着傳真機訂購外國靚衫？她說：「都重有㗎，不過數量方面就節制咗，以前會買十幾件，𠵱家訂幾件就收手，而且我發覺自己同靚衫真係好有緣，試過以前有啲好鍾意嘅衫，正價時買唔起，個心當然掛住啦，但係過咗一兩季後，梗會畀我喺啲怪地方搵番，價錢重係正價時候嘅十分之一。」
採訪：RitaLeung
攝影：ChanChiLam
髮型：BoffyCheungofChin.G
場地提供：TeresaBoutique