佘詩曼入行五年來，緋聞不絕，近期更被「嗲精」稱號及連串爭寵是非纏身。現在已貴為無綫當家花旦之一的阿佘，自言全靠羅嘉良令她的演技開竅，才能有今天的成就。
佘詩曼（阿佘）當年拍劇，曾被冠以「木美人」稱號，經過五年來的努力，今日阿佘已一躍成為無綫當家花旦。阿佘表示自己的演技得以進步，全拜羅嘉良這位啟蒙老師所賜。
佘： 佘詩曼 記： 記者
佘： 我拍《七姊妹》時，表現重係好緊張，但撈家（羅嘉良）拍每場戲都表現得好輕鬆，又做得好好。後來撈家叫我放鬆啲去做，開機前忘記晒啲稿，自自然然做出嚟就得，咁樣嘅效果會最真實，佢講得好啱，我到𠵱家都覺得好work，真係好多謝佢。
記： 重有乜人幫過你？
佘： 其實每個同我合作過嘅男主角都各有長處，佢哋個個都幫過我。同我合作得最長時間嘅係陳錦鴻，我哋拍咗四十集《雪山飛狐》，錦鴻好多理論，佢都教我好多嘢；林家棟都係好熱愛演戲嘅人，家棟鑽研劇本好深，但為人比較主觀一啲。
記： 你以邊位藝人做榜樣？
佘： 張曼玉，我好鍾意佢㗎，好欣賞佢演嘅戲，好藝術，好真實。我唔識佢，但都欣賞佢嘅處事方式，佢有自己嘅風格，為人亦都好低調。
記： 你係咪以張曼玉嘅成就為目標？
佘： 我唔會將呢啲嘢變成壓力，拍嘢只係想有成績出嚟，大家鍾意睇，反應好就夠。
記： 無綫今年似乎想極速捧你上位？
佘： 我由出道到𠵱家，公司都畀咗好多機會同栽培我，所以我年年嘅產量都咁多，要拍成九十至一百集劇。
記： 你一年內有八個月時間要拍劇，健康會唔會有問題？
佘： 總要付出嘅，我嘅身體狀況都OK，但當拍得好辛苦嘅時候，我會出去食餐好嘅，食好多甜品，我重會買好多唔同種類嘅雪糕返屋企食，食到頂住為止，咁我就會好開心，可以減壓㗎。
記： 聽聞你同唱片公司簽約做歌手？
佘： 我會先同馬浚偉合唱《帝女花》嘅主題曲，但我覺得一個人喺同一時間做兩件事嘅能力有限，我唔想做乜嘢都半桶水，𠵱家我重係以拍劇為主。如果有好機會，我都好有興趣試吓唱歌，但唔會話好急，發夢都諗住，總之我好信任公司嘅安排。
撰文：朱芷瑩
攝影：仇志德
協力：羅慧敏、陳慧安
髮型：HairCulturebyTavinLiu
服裝提供：SistyrMoon
電單車提供：亞林電單車行