佘詩曼過去曾與仁濟總理李念緯、林家棟及張智霖等，先後傳出緋聞，近日傳得鬧哄哄的緋聞男友，則是曾任職無綫化妝師的江中平（中仔）。中仔早前自立門戶開設化妝學校，阿佘不但送贈花籃，到現時阿佘無論拍廣告或出席大型活動，都繼續指定中仔做其御用化妝師。
記： 你𠵱家重搵中仔化妝，唔驚繼續傳緋聞？
佘： 藝人係應該以最好嘅姿態出嚟，俾人覺得好靚，冇理由為某啲原因，而令自己冇咁靚㗎！我𠵱家係有同中仔合作，但唔係每一次都搵佢，睇情況同環境。我唔排除將來會轉化妝師，有第二個化妝師令我更靚嘅話，我一定會試。
記： 你同中仔有冇發展可能？
佘： 我同佢識咗好多年，入行識到𠵱家，可以發展早就發展咗。我哋只係工作上交往，亦係好朋友。
記： 你入行五年都冇拍過拖？
佘： 係試過對一個圈外人有感覺，但當有感覺嘅時候就要開工拍劇，一切就化為灰燼啦。佢會覺得點解你日日都要開工嘅？你係咪唔想出嚟呢？所以後來我同佢就不了了之。
記： 有冇試過愛上拍劇嘅對手？
佘： 我只會欣賞佢，做得藝人嘅，梗有一定嘅光彩同吸引力，但吸引唔代表會愛上佢，愛係好高深莫測嘅，唔係話愛就愛。
訪問當日，阿佘在電視城化妝間甫聽到電視機傳出的港姐音樂，港姐出身的她即時轉頭看着電視畫面，直至整個港姐廣告播完。阿佘笑說：「我一聽到呢支音樂就會震一震，因為會提醒自己又大一年。」
新一屆港姐又開鑼，阿佘醒各候選佳麗六字真言必勝技：「少說話，多做事。」