收費台獨家播晒今屆世界盃六十四場比賽，有啲都算搞得有聲有色，不過採用多角度嚟播啲比賽，之我求大俠覺得無謂。
老實講，睇波嘅球迷，絕大部份都係只會關心戰局嘅變化，邊度有咁得閒理比賽球隊嘅後備球員同教練喺度做啲乜。所以話呢，收費台整個「西看台」同「東看台」出嚟，似乎有啲浪費資源喎。
另外，收費台重喺某一個台同一時間播場波同埋後備席嘅情況；但係喺香港地，有幾多個家庭屋企會有個成百吋大嘅電視機呀，一般都係得嗰廿幾三十吋，如果重將個畫面一分二，細到得蚊螆咁，叫啲人點睇呀？
國際足協唔俾喀麥隆着無袖波衫踢今屆世界盃，喀麥隆為咗「忠於原著」，結果喺噚日對愛爾蘭場波，整咗件黑色袖波衫出嚟。不過，我求大俠就覺得喀麥隆件波衫設計麻麻哋，事關驟眼睇班球員好似喺入面着咗件黑色底衫，再喺面穿件無袖波衫，望落去真係有啲不倫不類。
原來去日本幫BBC講世界盃嘅前愛爾蘭國腳麥格夫，因為喺架飛機上面搞事，結果畀BBC炒魷魚。堅尼早排先因為講粗口鬧愛爾蘭領隊麥卡菲，搞到畀人逐出世界盃；𠵱家麥格夫又搞單咁嘅嘢，睇嚟愛爾蘭足總要諗諗計至得。
早排我哋話有個叫史施彭斯嘅波蘭孤兒，踢爆波蘭足總主席列斯域斯講大話，喺波蘭出線世界盃後冇帶佢去睇日韓睇波。唔知列斯域斯係良心發現費事俾人講閒話，終於應承史施彭斯。希望列斯域斯經過今次事件後，下次唔好再信口開河。
俄羅斯喺今屆世界盃表現得好低調，而到目前為止，佢哋教練羅曼斯夫連一次記者會都未開過。有時低調有低調嘅好，起碼唔會放流料。但亦反映咗佢哋真係唔太受球迷歡迎，如果佢哋有新聞價值，就算佢哋自己唔放料，記者都會做嘢。
法國喺揭幕戰落筆打三更，最開心嘅應該係巴西佬。好明顯巴西人未忘上屆決賽慘敗之辱，眼見法國輸比塞內加爾，佢哋報章乘機落井下石，將塞內加爾捧上天之餘，又取笑法國唔掂。我求大俠諗，如果今屆巴西贏番法國一次，肯定媲美國慶日。