報紙銷路不振，係最近令報館老細最頭痛嘅事，聽記者W講，大概只有好震撼嘅新聞（例如廉署調查高級警司）或者賽馬日，先至見到起紙，平時嘅銷路就牛皮靠軟。
記者W懷疑自從《都市日報》面世，免費在地鐵站派送之後，好多市民搭地鐵睇完《都市日報》，就失咗買報紙嘅興趣，但呢個觀點只係「靠估」啫，冇乜實質證據，要做吓市場調查至得。
公關靚女康妮就提供另類意見，佢話啲上班一族朝頭早到中環上班，喺Oliver、Starbucks、麥當勞三間連鎖店，都有報紙睇，Oliver有《iMail》、《南早》、《經濟日報》、《明報》；麥記有《成報》、《星島》、《iMail》；Starbucks就有《明報》、《南早》。康妮朝早到唔同地方食早餐，入遲啲就唔見晒啲報紙，有兩朝，康妮見到一位男士入到Oliver，先搶一份報紙擺喺自己個位，先至行埋counter買早餐，康妮話：「食早餐睇報紙，正是手快有，手慢冇，估唔到大家咁重視一份報紙。」
以左丁山小人之腹，大家想睇免費報紙，唔想買就真。香港人現時慳得就慳，每日慳六蚊，一年可慳番二千一百九十元，是否一個小數目，見仁見智了。
社會環境既然如此，報紙銷路只要能保持唔跌紙，已經好唔錯，想話升紙，實在係大工程，如果能做得到，值得老闆發雙糧。