港股上個禮拜嘅走勢好似病貓咁，5個交易日裏面跌足4日，好多投資者都話係因為外圍偏弱，又話印巴會打仗，所以令到港股跌到落去啲主要支持位都唔識得「重振雄風」，反而重愈跌愈有。
伏勝認為今次港股之所以咁弱，完全係因為上個月太多投資者睇好後市所致，當個市升唔穿心理關口萬二點後，就引咗好多人出嚟平好倉，甚至反手造淡，所以個市喺成交升番些少下，回吐壓力重愈來愈大。
聽行家講，由於後市仍然唔見得會回升，出面班Trader已經部署今個6月唔做咁多嘢，因為大家手頭現貨唔多，如果個市挾咗上去，對大家都無好處。佢哋重話，如果唔係政府禁賭波，佢哋寧願攞多啲時間去賭波，都唔會選擇喺6月買股票。
上個禮拜二開市交易咗15分鐘就叫停嘅辰達永安（1189），聽講今次之所以咁急停牌，主要係因為公司同北京京泰傾緊有關注入北京旅遊項目，已經到埋門一腳，為咗唔想個價俾人亂咁舞，所以惟有暫時叫住停賽先。
市場內重傳話由於京泰喺注入咗新嘅資產之後，會進一步攤薄市場流通股數，令到市場上流通貨源佔總發行量進一步下降，為咗要令到隻股嘅流通量增加番，所以大股東打算會以8仙批出一批股份，不過就話到明批貨係唔會出街嘅。呢隻股仔喺停咗兩個交易日後，都未肯作出任何公布，所以個傳聞有幾真，真係要問番辰達嗰邊嘅人先知。
據伏勝所知，京泰同辰達合作喺去年已經有前科，唔算係新料，今次京泰攞出嚟做注資嘅旅遊項目，聽講連中旅呢啲國內旅運大哥都攞唔到嚟搞，如果今次真係俾辰達搞掂個注資項目，話唔定真係分分鐘可以幫佢翻番身。
伏勝