周杰倫日前到日本領取MTV台頒發嘅獎項，重係由日本偶像組合DAPUMP頒獎畀佢。
周杰倫話知道日本歌迷唔多識佢，但佢今次去攞獎，可以同台見到濱崎步同安室奈美惠就覺得好興奮。
有消息話，本來周杰倫緋聞女友蔡依林今次都陪佢去日本，點知重讀緊大學嘅蔡依林原來要考試，為怕考試唔及格，惟有打電話同周杰倫講話唔陪得佢去囉。
第九屆上海國際電影節及電視節喺今個禮拜六（八號）喺上海揭幕，到十三號閉幕。趙薇自從喺長沙俾觀眾上台淋屎之後，將首次再喺內地公開演出，出席呢個電影節嘅「星河飛歌」大型開幕演唱會。同台演出嘅重有郭富城、酒井法子、周迅、姜文、許茹芸、高倉健、蕭薔同埋美國百老匯演員吉米德斯。
林曉峰同拍拖十年嘅女朋友潘菁華分手，有傳係因為康子妮介入。雖然早排林曉峰同康子妮被人發現前後腳去紅館睇黎瑞恩演唱會，但佢哋依然都話唔係拍拖。不過，上周四下晝五點幾，馮仁昭喺金鐘太古廣場嘅停車場，親眼見到佢哋兩個手拖手，唔通咁嘅行為都唔算係拍拖？
何韻詩噚日出席商台「無煙無掛新一代」結他課程面試。一向好怕煙味嘅阿詩，話希望搵到個唔食煙嘅男友，可惜佢過往嘅男友個個都係煙民。問阿詩會否喺接吻前，要求男友刷牙去煙味時，她笑謂：「咁又冇，不過每次都畀啲嫌棄嘅表示佢囉！如果佢冇反省，就算啦，我個人愈大，要求就愈低。」
谷祖琳（Jo）噚日喺商台後花園為佢首張個人EP《JoKoo》舉行小型演唱會，有百幾個fans捧場。阿Jo嘅父母同一班親戚，包括阿叔谷德昭都有捧場。肥谷重上台送咗一隻石燕畀阿Jo，寓意佢唱歌好似雀仔咁好聽。而身為唱片公司工作人員嘅梁詠琪前男友Kenny，噚日亦有為阿Jo喺現場打點。