財政司司長梁錦松新官上任就話政府送魚不如教人捉魚，第一份財政預算案又推本土經濟，噚日佢終於親自落區，去成日講發展本土經濟嘅西貢區睇吓，重即場親身示範佢嘅精湛嘅釣魚術。
阿松首先去睇吓西貢個海旁海鮮檔，唔知係咪財爺出巡，噚日條海鮮街係靚咗，又乾淨咗。可惜喺入口處個牌樓同沿路燈箱設計就鄉土咗少少。
除咗個牌樓，嗰度重會擴建惠民街休憩公園，又會有個人工湖畀人放紙船，負責設計嘅政府首席建築師馮永基為阿松沿路解畫。八方聽聞阿松官邸都係呢位仁兄嘅傑作，怕且公園應該唔會好似個牌樓咁鄉土啩！
睇完海鮮街，阿松就親自出海釣海鮮，新聞處一早搵另一隻大船載記者，睇阿松示範。真係講都唔信，阿松喺魚排一落魚絲，唔使十秒八秒就有條紅鮪上釣，記者影唔到相，叫佢再釣過，佢又係一落絲就有魚上釣，重成兩斤幾重，唔通佢真係好叻釣魚？
有個魚排老闆喺後面好興奮咁講：「係呀！好易上釣㗎，餓佢哋（魚）一排就得㗎喇！」八方終於明白「釣魚論」真諦，就係要「餓佢一排」，香港人明白未？
傳真︰2623-9278
電郵︰