.前日本「國寶」三浦知良近年人氣雖跌，但喺日本足球界依然好有份量，《東京體育晚報》就搵佢講日本隊禮拜二喺分組賽首場對比利時，應該點樣打至有機會搶分，而呢位曾經喺意大利搵食嘅名將，竟然提議杜斯亞用同佢同期嘅老將中山雅史同柳澤敦踢正選，重話唔好怕對手有幾體力化，主動同佢哋鬥攻。
日本黃色事業向來相當興旺，當大家以為舉行世界盃決賽周會刺激生意時，有報道指，有「架步」為免不必要麻煩同溝通上的問題，索性喺招牌上面用五種不同文字，包括英文、葡萄牙文、俄羅斯文、德文同意大利文，寫得清清楚楚，只接受會員入場。
日本大報《朝日新聞》作為今次世界盃日本賽區官方報紙，自然大做，除咗加料報道外，每日打完頭兩場波都會即時出份免費號外，喺各主要城市火車站派畀市民；前晚揭幕戰大熱衞冕的法國爆冷輸畀塞內加爾，唔使一個鐘已經開始派，唔少事前唔知賽果市民睇到法國輸波都嚇一跳。