近一年來，阿佘的負面新聞可謂排山倒海而來，既傳她是生電王、嗲精，又傳她與郭羨妮鬧不和，指二人拍新劇《帝女花》時互相爭寵。雖然是非多多，但阿佘卻表示不在意自己是否遭金手指篤背脊。
記： 成日都有傳聞話你係嗲精，鍾意放電，你自己點睇？
佘： 可能係我聲帶嘅問題，好女仔聲，而我個樣又好女仔，啲人覺得我係啩！我又冇話特別做啲乜畀人睇。
記： 係咪對呢啲傳聞已經好麻木？
佘： 做番自己囉，做個舒服嘅我，從來都冇人當面話我嗲、放電，係啲報道寫之嘛。
記： 咁你覺得自己嘅性格係點？
佘： 其實我好男仔頭，好獨立，算係樂觀㗎啦。
記： 你同郭羨妮係咪不和？
佘： 我同郭羨妮friend㗎，不和都係你哋講之嘛，人哋都冇講過，可唔可以信吓我哋呀？
記： 咁郭羨妮係咪你嘅競爭對手？
佘：咁講嘅話，咪全部女藝員都係競爭對手？我唔會去諗競爭，每個人都有唔同嘅戲路同吸引力，大家各有風格，各有所長。
記： 之前有傳滕麗名係唱有老闆送車畀你嘅嫌疑人物，你有冇懷疑過佢？
佘： 懷疑？唔會，咁做對佢有乜好處？我哋有時會一齊燒吓嘢食，冇乜影響呀。
記： 你近期咁多是非，有冇諗過係俾人篤背脊？
佘： 我唔想考究呢個問題，唔想自己唔開心，我只係抱住簡單舒服嘅態度，做好自己嘅嘢。