相信好多人都會留意到，前日揭幕戰開波之前，有博彩公司盤口起咗急劇變化，歐洲一哥法國讓咗塞內加爾成個禮拜嘅球半盤口，突然急跌到只讓一球/球半，重要係得八折近乎低水，真係有咁多人咁犀利，喺最後一刻押重注喺塞內加爾身上？
其實呢場波捧塞內加爾下盤嘅真係大有人在！道聽塗說之下，原來星期日施丹踢完友賽之後就話今場唔出得，好多人真係即刻轉軚，懶理你踢咩陣式戰術，見法國都重係讓球半無乜郁，已經喺周中搵外圍莊家入咗塞內加爾下盤；而呢場波地下盤口其實已出現過幾次升跌現象，到開波之前或者真係有人接唔住，扔番啲下盤出嚟搵賭波公司分擔吓風險，咁大家咪見到法國上盤突然「降溫」呢個情況囉！
講番今日嘅賽事，由於有英格蘭登場，喺英國嘅各大小博彩公司，亦開出咗好多得意嘅盤口去「支持」自己國家球隊；個人認為唔好太過「分散投資」，好多時可能畀你吼中「首個入球者」，轉過頭就爆咗個「波膽」，或者輸番啲「紅、黃牌數目」，到完場計數發覺原來重要蝕少少，唔夠過癮。
自己幾鍾意「研究」吓「首個入球者」，其中有個要訣，就係將目標鎖定喺一啲專門負責死球嘅球員，好過博嗰啲得幾倍分頭過熱嘅前鋒球員；因為呢啲死球專家或者十二碼劊子手，有時會係一啲有十倍以上分頭的中、後場球員，呢場波英格蘭隊長碧咸就有接近十一倍分頭，抵玩過奧雲同埋拿臣啦！
文：華度