南韓紅到發紫嘅天后金喜善，噚日為咗要睇法國對塞內加爾嘅揭幕戰，特登唔接通告，實行支持國家首次辦世盃；唔知佢係標準足球迷定係愛國義士呢！
南韓辦世盃，諗住會趁機賺番筆勁，但昨日開幕戰場館啲小食部各類食品售價絕對合理，礦泉水一支六蚊（港元計）、汽水九蚊（比商舖價還要平）、腸仔十二蚊、一筒薯片十八蚊；唯一要彈嘅係種類不多。
球賽又怎能無靚女呢！南韓當然知啦，佢哋安排咗一班青春少艾喺連接揭幕戰場館嘅地鐵站內，列隊歡迎各國球迷；位位靚女笑容滿面，最抵讚係任憑男女老少埋身一齊影相，真識做！
一直都講緊要杜絕黃牛飛，但係噚日喺球場外見到唔少黃牛黨員，事關賽會為咗慳時間，臨時決定只查飛唔對名，咁就正中一班黃牛黨嘅下懷！