老牌書局老總C在土瓜灣返工，經常在土瓜灣紅磡一帶活動。呢日在一個文化網站啟用典禮碰到佢，佢對網站內容、形式甚為讚賞，認為對小學生極為有用，家長應該在家鼓勵子女上呢個網。
唔講文化網，講吓民間疾苦，老總C話左丁山寫過中年人喺快餐店執早餐，佢自己喺土瓜灣、紅磡見過唔少。佢話一啲中年人，幾斯文，最初怕怕羞羞，執早餐執得好唔自然；但一個月之後，老總見到呢啲老友已經放棄尊嚴面子，執得好似好應份咁。
老總C讀社會學出身，對社會現象觀察細微，喟然而嘆曰：「香港社會下滑迹象明顯，市民失去信心，不再堅持自我奮鬥，視免費午餐為應份，死火矣。我哋書局近月多咗唔少人客，最初以為生意好轉，但發覺旺丁唔旺財，我親自落去巡查，發覺一啲新書俾人喺某幾頁對角摺埋，於是次日再去巡一次，睇到一啲人客走到書架拎本書出嚟，由摺頁開始再睇，於是恍然大悟，啲人係嚟書局打書釘，消磨日子。」
打書釘，左丁山都試過噃，小時候冇錢買書，咪企響書局內企足一小時睇書，睇到俾人趕；但老總C話：「當年氣氛唔同，嗰陣時我哋人人有向上之志，信心十足，打書釘為咗爭取知識向上爬。但我今日見到嘅係失業百無聊賴，壯志消沉，以打書釘嚟消磨日子，所以我覺得好驚，香港好似下沉緊。」聽完老總C嘅說話，左丁山悶悶不樂。