八方之前同大家預告嘅記協籌款晚會噚晚開BALL，賭王燊哥同財爺阿松自己送羊入虎口，記者梗係圍住佢哋問點睇記者。燊哥講咗句記者最想聽嘅話「任問唔嬲」，又話同記者好老友，於是先接受訪問，大爆地產建設商會開咗會，一致反對北角邨混合發展，話「有錢人唔鍾意同𢱑腳趾嘅人」一齊住喎。真激！
接住又同四姨太翩翩起舞，跳完喳喳，又跳Tango，真係寶刀未老。跟住到「青樓名妓」獻唱，張永霖身穿白色中山裝，道具齊全，唱《恰似你的溫柔》想殺死人，但係籌嘅錢遠不及江素惠多。佢又爆話個外號係阿松改嘅，指嘅係香港電訊被人「揸乾後賣埋」。
記協真係搞嘢，今次籌款目標係47萬5千元，唔知係咪諷刺阿松想減公務員人工4.75%。阿松就好識做，大讚記者「非常積極、勤奮、主動」。阿松上台致辭嘅時候講咗個無厘頭嘅擔水勵志古仔，話時話，傳媒成日話煲呔同阿松唔係好啱，但係阿松噚晚同記者傾傾吓偈，無端端認煲呔做「大佬」，因為煲呔大過佢喎，都幾無厘頭。
咁多猛人親自去洲際酒店捧記協場，結果現場籌到超過五十萬蚊，比原定目標高。
又有一段小插曲，就係當徐詠璇捐錢贊助港大同學張永霖唱歌時，竟被司儀毓民稱為「徐娘」，激到有人飛咗隻叉上台，可見女人唔好蝦。
傳真︰2623-9278
電郵︰