傳媒在同一天之內，先被指控要為名人墮樓身亡的事故負責。又要為偶像在公路上玩命超速被抄牌一事孭鑊。總之講來講去，都係傳媒狗仔隊死跟做壞事闖的禍，名人本身，推搪得一乾二淨。記者追訪跟蹤名人，確是大趨勢。但名人未必個個是蜘蛛俠迷，夠膽擒出簷篷避開耳目。不過凡事有例外，萬一真係有高官名人依樣葫蘆，避走窗台，大家不妨發揮想像力，估吓有甚麼合理供詞。
如果擒出窗台的是梁財爺，他不是老槍，不可能執番包煙，九成係將窗台當跳板，學習高台跳水。假使樓下沒有泳池，就對記者說，他想執番橫飛出第十七個洞的高爾夫金球。
擒出窗台的是寶哥哥的話，唔使問阿貴，一定係昨晚太happy，晨早起身蒙查查，將窗口當成房門口，忙着出去搵番對鞋。
咪以為女人不會擒高擒低，保安局長明知山有虎，偏向虎山行的性格主宰命運。既然長毛夠膽抬棺示威、在立法會抗議，保安局長點會俾佢搶晒風頭，一於擒出窗台，戙高對腳，搽完趾甲油後，若無其事，睇她的Time雜誌。此刻，就算重案組拍門，她也不會腳震。
如果發現擒出窗台危坐簷篷的，是警隊一哥和廉記阿頭，大家放心，他們正在表演空中解體前的合作無間。傳媒勿搞大件事，記者舉機影相，即刻孖葉鎖你！