𠵱家樓市雖然叫好番啲，但樓價都唔算高，葉德嫻最近就以低價買咗大坑道宏豐臺一樓一個單位，成千呎連車位都只係二百二十五萬。
雖然宏豐臺係舊樓，有成四十幾年樓齡，但每呎價錢只係二千幾，喺同區嚟講都算平，馮仁昭八到葉德嫻睇咗好耐樓都唔啱，原因係佢有座巨型三角鋼琴，入唔到好多樓嘅𨋢同大門。
今次佢揀咁舊嘅樓買，而且買一樓咁低層，都係因為要方便將佢座心愛嘅鋼琴搬入屋。
雖然層樓只係二百幾萬，但因為樓齡咁高，大部份銀行都唔肯做按揭。不過葉德嫻今年啱啱開完演唱會，而且反應好好，要付出二百幾萬，對佢嚟講絕對唔係問題啦！
王嘉明噚日去咗新城做訪問，本身係印尼華僑嘅嘉明，喺節目度介紹印尼小食。
問嘉明最近有乜嘢新玩意？佢話：「我最近學緊滑水，都見到好多女仔玩，最勁嘅就係佢哋都有四嚿腹肌，又玩得幾叻，我諗住唔可以輸畀啲女仔，所以要努力啲學。」
蘇有朋早排喺北京拍攝一個波鞋廣告，酬勞接近三百萬港幣。
不過，蘇有朋賺錢之餘重做埋善事，佢將一半收入，即係大約百五萬，捐畀中國「偏遠地區失學兒童福盟」呢個機構，希望可以幫助內地一啲冇書讀嘅小朋友，可以重返校園。
陳慧琳前日喺上海出席宣傳活動，夜晚八點幾返到香港，依然精神奕奕。自從有瘋狂fans上佢唱片公司，以死要脅要求見一面之後，佢所到之處保安都好嚴密。
不過Kelly唔係怕咗fans，只係主辦單位自發性幫佢加強保安。Kelly前晚機場話：「我從
陳啟泰（Ken）噚日去咗港台做訪問，近來亞視又裁員，佢認為在所難免。阿Ken話：「可能係合約到期，又唔夠show，所以先裁啫！𠵱家市道咁差，間間公司都係咁㗎啦！有乜嘢出奇。」跟住阿Ken笑住講：「不過，希望我老屎忽，公司唔炒我啦！」
鍾麗緹早前接受CNN《亞洲名人聊天室》網站嘅訪問，佢話當初加入娛樂圈拍電影，係一生人嘅轉捩點，而佢希望自己嚟緊可以做歌手，咁就可以達到佢成為專業表演者嘅夢想。但馮仁昭估唔到鍾麗緹最想唱嘅，竟然係國語歌。
譚詠麟（阿倫）同陳百祥（阿叻）前晚喺電視城錄影陳任主持嘅《名人飯局》，阿叻示範煮即食麵，阿倫就煮海南雞飯。阿倫竟然出茅招，出動現成外賣海南雞，佢話：「呢啲嘢眨一眨眼就做好㗎啦，你睇阿叻吖，將硬嘅即食麵可以整到更硬。」阿叻就話：「平日我會飲紅酒食即食麵。」
張燊悅噚日二十六歲生日，佢去港台出席活動時話前晚已經秘密開咗個私人派對，收到八十幾份禮物，但就未有時間拆。問佢緋聞男友雷頌德（Mark）會唔會送禮物？佢好開心咁話：「我諗會啩，係朋友都會送禮物啦！」
至於阿Mark有冇去佢個私人派對？燊悅即時有口難言咁唔知點答。