馬會噚日公布嚟緊一季可自購新馬嘅會員名單，一共二百四十個，如果佢哋全部順利購得心頭好，馬迷就多咗好多選擇；此外，馬會亦批出七十個名額，供現任馬主換馬，目的係淘汰低分馬，令賽事質素提高。
八方翻閱嗰張名單，好多都係大家熟識嘅名人，但實在太多，冇法子全部介紹晒，惟有揀兩個特別有趣嘅同大家分享。
其中一個係鄭裕彤、李兆基及明嘉福三人組合；彤叔一向有養馬，現役跑緊嘅有兩隻：一隻「紅鑽石」、一隻「綠鑽石」，後者同「Charles明」合作，綠鑽石成績好好，出三次贏兩次；但隻紅鑽石正走下坡，所以再搵埋李四叔同明嘉福，買過一隻勁馬，以便一齊鋤弟之餘再一齊拉頭馬過吓癮。之前有隻「鑽王」同「鑽神」，亦係彤叔同人夾份。
除「鄭李明」組合外，八方發現名單上還有「MsCally鄺美雲」，呢位由娛樂明星搖身一變為珠寶商人嘅大美人，原來都喜愛賽馬活動，重成功做埋馬主。彤叔名下嘅馬喜以「鑽石」為名，你估鄺小姐鍾意「翡翠」定「黃金」呢？
傳真︰2623-9278
電郵︰