噚日世界盃終於開波，外圍佬又開始陸續出現喺有電視直播嘅餐廳食肆打躉，將電話放晒喺枱面大講「手電經」之餘，其間電話響個不停，情況重勁過之前英超聯同歐冠盃未收咧嘅時候，直到七點半開波……
睇嚟政府想用條新例來令到大家唔好賭波，暫時真係未收到乜大效果；嗰啲玩開濕碎雞仔注嘅朋友，有好多真係會費事麻煩。銀行又唔肯幫佢哋過數，而放棄呢小小娛樂嘅，之不過都重有好多「有心人」，從以前喺網上投注，改為𠵱家幫襯啲外圍艇仔囉！相信呢個世界盃真係起碼流走咗港人十億八億畀澳門或者外圍莊家，家陣香港經濟已經唔見得好，真係諗起都令人心噏。
鏡頭番去茶餐廳喇，噚日間舖頭可能真係人氣旺盛，啲冷氣好似唔係好夠咁，重要嗌咗杯熱奶茶，真係捉蟲！忽然間左面張枱又傳來喊熱聲，外圍佬A話：「家陣咁嘅天氣又熱又焗，踢世界盃嗰班球員都咪話唔辛苦！」
外圍佬B接住話：「你唔好理，人哋個個身價都有番咁上下，每個禮拜𢭃成十幾萬人工，打贏呢個世界盃又有幾百『粒』落袋，幾熱都無所謂！」
輪到外圍佬C講嘢：「淨係班歐洲佬係咁啫，所以你唔好睇小啲非洲仔，佢哋熱慣，又要博表現；希望畀球會睇中，打得好過你哋班法國佬有乜出奇！」
係㗎！我都覺得𠵱家六月天，對於啲歐洲球隊真係唔多有利㗎，今日就又有三支歐洲隊出戰，其中南美球隊烏拉圭及非洲雄師喀麥隆就唔怕你天熱，球隊又有實力；對手丹麥及愛爾蘭喺之前友賽表現唔見得標青，丹麥進攻無乜板斧，愛爾蘭中場無堅尼真係勢危，照佢哋咁講，呢兩隊今日都可望旗開得勝，聽日再話你聽點解要信佢哋講！
文：華度