噚日操練後記者會安排咗范志毅同江津訪問，有南韓記者問佢哋鍾意食邊種南韓菜，江津就話鍾意辣泡菜，范志毅就鍾意湯飯，唔知係唔係收操後格外肚餓，范將軍重手舞足蹈，愈講愈興奮，差啲想拉埋記者一齊食晏。
同哥斯達黎加記者阿盧約傾開偈，先知佢噚日早上至剛剛到達濟州，立即飛的去球場睇中國隊操練，操練完畢，飯都未食又要趕去機場，搭內陸機返到哥軍駐紮城市城南，一來一回認真夠頻撲。
噚日開操之前，全體國足職球員到球場影靚仔團體相，但影相位置竟然安排背對住記者席，令在場記者只影到國足背脊，好多行家十分不滿，其中一個巴西記者重話，衞冕冠軍嘅法國影團體相都冇中國咁大牌。