港股噚日下午跌勢轉急，恒指收11301，傳聞大戶因應大摩指數調整比重，亦調整本身嘅投資組合。中移動（941）與和黃（013）等遭到拋售，不過相信調整已經完成，估計下周唔會再受此項因素所影響。
從事手袋製造及貿易嘅華聯（969）最近股價勁升，主要因為大戶追捧出口復甦概念股。噚日傳出華聯原來亦搞生化業務，而且重會將生化業務分拆上市，相信消息原意係想進一步刺激股價上升，但點知股價竟然掉頭回落，收報1.40元，跌6.7％，不過成交唔大，只有206萬元。
ｉ師傅話，之前基金掃貨買華聯，係想增持受惠美國復甦嘅出口股，而唔係生化股，如果華聯真係有生化業務，可能會遭部份基金減持都唔定。事實上，生化股與當年科網股嘅發展唔係分別太大，成功例子少，失敗例子多，能否買得中，好睇彩數，所以只適合創業基金進行投資，一般傳統基金絕少沾手。試問投資於傳統業務股份嘅基金，又點會買一隻擁有生化業務嘅股份呢？
隆成（1225）雖然遭基金股東減持近27％，但近日跌幅唔大，因基金股東以每股1.33元大手沽貨，其實獲得其他投資者承接。基本上呢個係好消息，即係話1.33元有強大支持，如果在此水平守穩，有機會大幅炒上。
生命科技（1180）近排頻頻與證券分析員會面，推介公司業務前景。睇嚟後市又想有一番作為，但噚日此股遭拋售，股價跌4.1％，收0.35元，成交達3136萬元。
阿虎