羅文（籮記）日前突然入院，隨即惹來諸般揣測，但其助手則解釋籮記只是因吃魚生致腸胃不適。昨日本報獲得消息，原來籮記的癌細胞已由肝臟擴散至腹部，未來三個月將會是籮記的危險期。
現年五十二歲的抗癌勇士羅文，日前因身體不適入院，有傳他是肝臟腫瘤爆裂，病情有變，但其助手阿東則聲稱籮記是吃了魚生，導致腸胃不適嘔吐大作，才被送院。不過，本報昨日獲得消息，指籮記的癌細胞已由肝臟擴散至腹部，情況極為危殆。
據消息指出，未來三個月都是籮記的危險期。雖然籮記發現病情惡化後，已即時入住瑪麗醫院診治，但經數日留醫後，籮記終決定回家休養。
對於籮記的病情，家庭醫生關嘉美認為即使病人被診斷為癌病末期，但如果能保持樂觀，生活得開心，亦可提升身體的免疫能力，有助控制病情。
關醫生昨日透過電話說：「有好多統計數字會話乜嘢癌病到咗乜期重有幾耐命，但呢啲只係統計數字，唔需要理會，實際情況每一個人都唔同。」
關醫生又說：「我都見過一啲例子，甚至醫生都認為冇幾多日子，但病人又生存咗好耐。所以我唔會同病人講應該重有幾耐命，而係叫佢睇開啲，做一啲令自己開心嘅事，因為心情好可以令免疫能力提升，控制到癌病。
「而如果覺得試開嘅治療係有用嘅，無論係中醫、西醫亦抑或係氣功，都可以繼續，因為呢啲治療都可以增加免疫能力，又可以增強信心。病人應該諗住活多一日就賺多一日，用賺日子嘅心態去對待個病，珍惜所餘嘅日子，鍾意做乜就做乜，唔好畀自己壓力。」
其實去年五月籮記發現肝臟有腫瘤時，一度安排入院將腫瘤切除，不過其後籮記表示醫生為他照內窺鏡後，指他的腫瘤屬良性，只需打針食藥便可。而籮記後來亦訪尋名醫治病，其中包括中醫陳伯，更一度被指病情好轉。沒料到日前，籮記再因病情惡化而要入院留醫。
此外，羅家英昨日在九龍灣展貿主持《2002有線世界盃嘉年華》時，亦提及籮記的病情，他說：「我同籮記唔熟，但我知阿姐（汪明荃）有打電話畀籮記，希望佢早日戰勝病魔。佢嘅病情吸多啲氧氣會好啲，例如行山對佢會好有幫助。」