滙科數碼（8068）自從舊老闆走咗，債主正式買咗隻殼後，隻股終於噚日復牌，復牌前夕，有人諗住新老闆會有搞作，所以周圍叫人買，但經紀陳提醒小初，千祈唔好亂掂。
滙科噚日復牌，一早就炒上去2.6仙高位，收市雖然重升16.67％，收2.1仙。不過，朝早湧上去買貨嘅炒家，不單止賺唔到錢，而且重要坐艇，睇嚟經紀陳真係冇亂點。
經紀陳話，其實滙科喺好耐之前，股價玩笨豬跳一役中，有唔少提供孖展嘅證券行中咗招，雖然係斬倉沽貨，但缺乏承接，其實沽唔晒，所以數埋嘅蟹貨，真係多到你唔信。
因此噚日買盤掃上之時，蟹貨就大量蜂擁而出，收市滙科數碼唔跌得，佢覺得已係奇迹。
佢重話，上次雄豐（1141）復牌首日，都叫做炒過一轉，但第二日股價已經跌到阿媽都唔認得，所以小初唔好手多多。
慕容小初