恒指噚日反覆下跌78點，收11301，一周埋單跌325點，跌幅2.8%。全月計數則跌196點，跌1.7%，但5月高位及低位仍高於4月，保持上升形態。
恒指周線圖連續兩周出現大陰燭，但估計形成3隻同等大細烏鴉嘅機會不大。恒指本周低位11260及50周線（現處11186）應有一定支持，就算守唔住，亦有20周線（現處11186）頂住，加上平均線方面，10周線升破20周線及50周線，屬升市排列。因此估計恒指急跌兩周後，下周就算唔反彈，亦會跌勢放緩。趙飛雲覺得現階段造好造淡皆缺乏值博率，所以暫時高掛免戰牌，等候港股出現較明朗方向。
前日提過長實（001）跌至平行通道底支持，可能會係率先反彈嘅藍籌股，噚日果然逆市反彈，升1.25元，收72.25元，重回50日線（現處72.20元）之上。短期阻力係回落中嘅10日線（現處73.80元，約以每日0.30元速度下滑），升破則上試20日線（現處74.50元），正股短線固然缺乏水位，就算炒輪亦不易轉身，只宜即日鮮。長實噚日逆市上升，但沽空成交激增至4.3億元，反映好淡爭持激烈，稍後一旦分勝負，股價將有一番波動，昅實應該有着數。
趙飛雲