海外車訊：
豐田Alphard散發誘人魅力

日前，日本豐田車廠正式推出全新Alphard車系，此車不但被視為係Granvia嘅接班人，而且重係廠方向幾近同期推出嘅新版日產Elgrand，予以還擊嘅武器嚟㖭；全新Alphard擁有極富肌肉感嘅車身線條，從而凸顯出新車年輕活力嘅一面。據聞坊間已有水貨車行有意將之引入，不如今日就一齊嚟先睹為快，睇睇新車有何吸引之處啦。

記者：鄭達基

車廂豪華氣派十足
至於車廂布局方面，Alphard嘅豪華程度十足，車內座椅除以高級真皮鑲嵌而成，令承托力提升不少之餘，變化多端嘅座椅配搭，亦能迎合用家不同嘅需要，當然唔少得重有瑰麗嘅桃木裝飾啦。設備配搭又見齊全，除有電窗、電鏡及電天窗外，另外重有原廠恒溫冷氣、高級音響，同埋多個安全氣袋連充氣簾幕組合㗎。

引擎配搭動力充裕
由於全新Alphard採用咗新版Estima嘅底盤結構，不但令行車舒適性及穩定性得以提升外，就連引擎配搭亦與Estima相近，當中包括有一台能輸出159ps/5600rpm馬力嘅2.4公升直4引擎，以及另一台輸出為220ps/5800rpm馬力嘅3.0公升V6引擎，匹配4前速全自動波箱，從而令車子可有不俗嘅行車表現。

全新造型富活力感
擁有全新造型嘅Alphard，雖與Granvia一樣來得活像一個巨無霸，但變得極富肌肉感嘅車身線條，加上大型頭燈及闊大鬼面罩組合，卻頓時令賣相變得富有年輕活力感。另一方面，雙趟門配搭加上低地台設計，亦能有助加強乘客上落車時嘅方便程度；而闊大嘅尾燈組合，亦可給予尾隨車輛明確嘅提示。