一條「跨境賭博管制條例」，令到大眾「球迷」睇世界盃樂趣大減！以後「過關」、「波膽」、「首個入球者」呢啲考大家眼光，又可增加睇波時樂趣嘅賭盤已成往事；因為呢類以一博幾甚至幾十嘅盤口，睇怕都唔會有外圍佬接咗來做啩？
不過咁，香港人係食腦嘅，身邊一啲朋友仔就話，世界盃期間仍然「有計」可以繼續玩番兩手，例如阿邊個話買張長途電話卡，打過去馬交落注以避耳目；阿邊個邊個又話直情走過馬交住番一個月，一於「刺激澳門經濟，不再留港消費」。
事實上你政府有「張良計」時，各大博彩公司亦有佢哋嘅「過牆梯」，好似「富貴網」咁，已經作出咗相應行動，包括將喺投注人士信用卡上面顯示嘅公司名稱，由原本嘅賭波網頁公司，改做另一個風馬牛不相及嘅公司名稱；將網上博彩演變成為網上購物咁款，上網買嘢唔算犯法㗎喎？
當然，我係絕對唔鼓勵各方友好犯險嘅，不過見梳打埠為世界盃開出咁多盤口，亦都會心思思，或者搵時間過大海行番轉！喺呢度就唔講亞洲盤有乜心水嘞，睇每日《蘋果》嘅分析啦，但最緊要都係昅實各隊最新軍情，啲盤嘅變化絕對值得留意，日後會再同大家研究。至於過關亦唔打算落手，家陣世界盃一日打得嗰兩、三場，玩「即日過關」嘅話，就局住要喺呢幾場入面揀晒，局住就未必叫有心水啦！
其實重有「冠軍」呢瓣可以諗吓，當係「一個月長線投資」囉！𠵱家決賽周啱啱開始，有好多強隊個賠率都重係好吸引吓；個人認為好似法國、阿根廷呢啲得嗰四、五倍分頭嘅，就唔係咁值吼嘞，你有本事揀到一場標準盤，個獨贏賠率分分鐘都唔止呢個價口啦！但都可以好似賭馬仔咁，來個「一W三P」策略，德國同意大利就合晒「河