立法會噚日第二日辯論高官問責制，咁悶嘅場合，八方竟然見到平日「三點不露」嘅李國寶。早排寶baby俾緋聞困擾，加埋同舅仔潘廸生一輪拳來腳往，心情認真麻麻，但雨過天青，佢噚日心情甚靚，有問必答。
世界盃今日開波，八方梗係問寶baby會唔會去睇波，佢好開心咁話有老友請佢去日本橫濱睇決賽，原本都有人請佢去韓國睇半準決賽，但最終決定淨係去日本，佢重鬼咁擦鞋話睇好中國隊。但講到邊隊真係有機會捧盃，佢都係估法國；至於原本鍾意嘅阿根廷，寶baby運用佢獨有嘅「銀行家賽前分析法」，話人哋窮，驚隊波俾人「買起」喎。
除咗講波經，八方最想知係今次李國寶會同邊個一齊去日本？開頭阿baby扭扭擰擰唔肯答，後來八方追到佢去電梯口，佢先大大方方話同「男朋友」及兩個仔去。咁紅顏知己呢？寶baby竟然大大聲話自己冇女朋友，重叫記者介紹個畀佢識喎！
八方突然醒起去睇波冇理由着皮鞋，咁佢對波鞋又有冇繡番個大寶號呢？答案係佢對波鞋雖然唔係訂做，但一樣有佢個大名喺度。連波鞋都繡埋名，真係去到邊都避唔到狗仔隊囉。
傳真︰2623-9278
電郵︰