不少朋友到深圳創業都會遇上一個難題，就是惟恐當地員工不誠實，趁老闆人在香港，出茅招穿櫃桶底，那時生意做不成，分分鐘賠了本錢。想一嘗做老闆滋味，但又不能長駐深圳的朋友，可以試試先在商場或百貨公司開設專櫃，因為那兒有完善的管理制度，毋須擔心員工從中取利。營商種類，當然要挑些大路的貨品如時裝等，加上不用付加盟費，投資額大約15萬，你話有無得諗呢？
記者：曾順珍 攝影：楊錦文
少租街舖
初次開業盡量不要租街舖，因有保安、申請牌照上的麻煩，而且還得親力親為，比在商場或百貨開業困身。
留意轉手費
租舖時要查清楚舖位會否在短時間內清拆，另外還要計算轉讓費（由上手租客收取）在初次投資金額內。
熟人照應
最好在大陸當地有熟人照應，可提點開業時需要的牌照和手續。
這個位於深圳嘉賓路(國貿附近)的香港城，是個跟日式百貨公司陳設差不多的商場，內裏有不同貨品種類的專櫃租戶，全都是中高檔的名牌。香港人陳小姐，半年前在這裏租用約有25平方米實用地方，開設一間名叫迪萊斯的連鎖時裝店，對幾個月來的營業額亦尚算滿意。
「呢度啲人已經唔係好似以前咁，啲女人都知道出面嘅潮流去到邊度，佢哋會要求高質素嘅時裝，一件百幾至三百幾蚊嘅衫，佢哋會好捨得買，因為好多都係O.L.，所以接受呢個價錢。比深圳更入嘅地方消費力重高，呢樣係你好難想像到嘅，佢哋就好似以前嘅香港人咁，所以我覺得內地重好做。」近年香港人消費力差，更令陳小姐決心在大陸創業。
陳小姐並不是因為失業才到深圳創業，反而是因為上大陸玩得多，才興起做生意念頭。
「我本身唔係做呢行㗎，我喺香港係開茶餐廳，只不過我一向對大陸都無抗拒，所以幾年前我就上嚟玩，認識咗好多朋友，咁啱有個朋友問我有無興趣喺深圳做生意，因為佢打算喺大陸開連鎖時裝店，唔收加盟費，但就要畀保證金?15,000，以防售賣其他牌子貨品。我考慮咗一陣就答應。我唔識喺大陸做生意㗎，但我有班深圳朋友幫我搵門路，如果無佢哋，我都未必會開得成。」
因為迪萊斯是新牌子，在大陸無人認識，所以陳小姐話當初單是找百貨公司或商場租地方營業都非常困難。
「如果你唔係大牌子，商場根本唔肯租地方畀你，又或者向你收取特高租金，直至我見到香港城，心諗個名好有親切感，於是膽粗粗走上嚟問，點知個經理又好好人，居然肯租畀我，每月租金跟所有租戶一樣，是營業額嘅35%(連稅)。」
迪萊斯的時裝，價錢由?138至?350不等，款式走時尚優閒路線，是以開業半年，很受深圳年輕女性歡迎，就連本來曾拒絕陳小姐租舖位的百貨商場，都主動寄信邀請她考慮轉租地方。
1.不收加盟費。
2.收取保證金?15,000，不續約時會退還。
3.每年續約一次。
4.第一次買貨最少要?15,000。
5.要先畀?10,000作日後買貨按金，不續約時會退還。
6.要在商場或百貨公司裏開業，面積最少200平方呎。
陳小姐每星期只會上深圳巡舖一、兩次，她不停高呼自己好運，因為除可在這裏租到地方外，還請到一班好夥計，不單止勤力，而且有責任心。
「商場除統一收錢(即員工不會向客人直接收錢)同有保安不停巡視外，還會統一培訓員工，而且要求嚴格，每日都要員工準時返工開早會，如果某日營業額少咗，重會質問員工。如果你請唔到員工咩，商場都會幫你去搵人，見到啱先聘請都未遲。就連舖位嘅外觀都會幫你理埋，所以我根本唔使去管，可以講好輕鬆。但弊處係所有款項要喺一個月後，商場扣除咗租金才退還。另外如果生意額唔好，會被商場踢離場。」
因為陳小姐是連鎖店加盟商，所以毋須申請營業執照，只需要有連鎖公司的營業授權便可。加上她租的地方是位處商場，所以亦毋須申請消防或其他牌照，因為商場會為她代辦。
本來是茶餐廳老闆娘，突然要開時裝店，陳小姐坦言初時會感到有壓力。
「幸好我一向對潮流都有啲觸覺，唯一困難係初時開舖開得太急，好多貨未到就要開業，搞到唔夠貨賣畀客人，但客人又好理解無怪我哋，惟有叫公司盡快送貨。另外，我賣嘅時裝，當然唔會全部都好賣，唔好賣嘅我會即時減價甩手，因為做呢行最緊要識走貨。如果真係個款好唔掂，公司可以容許我跟其他迪萊斯嘅連鎖店舖交換款式，避免積貨，但唔可以退貨。」
陳小姐預計自己開業6個月已可6回本，還雄心壯志地在今個月於福田區開了另一間連鎖店。
「好多人話上嚟做生意賺得唔多。當然，如果同香港生活指數係唔可以比。你要明白，喺呢度可以賺到萬幾蚊已經係好富有，如果真係抱住呢種跟香港比嘅心態，我就會勸佢哋唔好上嚟做生意，費事嘥時間。」
好處
1.完善保安管理及員工訓練計劃。
2.員工不會直接交收錢銀，毋懼被穿櫃桶底。
3.商場會向當局申請消防、營業等牌照，減省申領工夫。
4.容易吸引人流，消費氣氛好。
壞處
1.營業額要達到標準，否則好易被人踢離場。
2.每月的營業款項要在下個月經商場減除租金後撥還。
3.當地人不熟悉的品牌會較難租到舖位。
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。