「想，我都想好似中咗頭獎，有嘢唔想做，老細吹我唔脹。」開宗明義，LMF就係「大懶堂」。結果大碟一等兩年（之間出過一隻EP）。
兩年多前開ARoom因為有錄音室設備，成班人玩吓玩吓，「都算無心插柳。」一張EP再加一張大碟造成莫大震撼。樂評普遍叫好，輿論大肆抨擊，而傳媒站在中間，探討粗口文化之餘，亦乘機火上加油，連選港姐都要問佢哋意見。
在娛樂版曝光率勝過二線姐仔，證明LMF人紅有價值，一邊被定為「潮流文化代言人」，另一邊重拍埋電視廣告㖭。
新大碟今日出版，內容比以前溫和了，「唔係唔鬧，不過無咁躁」一於武火轉文火，火細咗，但火頭照點人照燒。
記者：何兆彬 攝影：伍慶泉
記：新碟其實由何時開始籌備？
華：(互望，笑）隻碟都係一月左右先開始。之前忙乜？嘿嘿，其實一直都無話忙乜……寫得慢，主要係今次題目比較難找。
記：這兩年香港發生怪事不會少，題材怎會難找？
仁：開始前大家有個共識，就係呢張碟不要太戾氣，香港人已經夠躁，社會上咁多嘢鬧亦鬧唔晒嘅。我哋今次亦唔係無鬧，但就無以前咁躁。
華：除咗題材，我自己亦無以前咁多嚕囌。錄第一張EP時ARoom剛整好，有錄音器材，大家都諗住寫咗歌不如錄低佢，當時我對社會有好多嘢不滿好多嘢想講，可以話好好火。
相對起以前，𠵱家寫嘅歌就無咁火，我啲火真係吹熄咗喇……要強調呢句只可以代表我自己。講話懶，MichaelLau都成日鬧我「唔好咁×懶啦你！」，不過佢又真係一個好好好勤力。
記：咁即係隻碟無粗口？
華：無。今隻碟內容上根本無必要（有粗口）。其實我哋平時鍾意講粗口，亦唱咗好耐，係啲人小題大造，以前喺高山唱咗咁耐根本無人理。
肥：出完EP《LMFAMiGLiA》喺街撞到朋友，佢話「扯！今隻碟都無粗口，都唔好聽嘅！」最怕聽到啲人咁講。我咪諗：「哦，係呀，咁你咪聽囉。」
記：音樂上又如何調校？
仁：今次希望節奏上UN吓UN吓，成隻碟輕快啲，音樂性重啲，甚至會有JazzGuitar。音樂上今次有好大進步，可以話合作以來最好。而DJTommy嘅Sampling、CutnPaste就可以話到達另一個境界，就算聽開佢嘅人都會嚇一跳。
記：兩年下來，對香港樂壇重有乜嘢講？
華：無，都係一樣咁死。你睇𠵱家啲人最鍾意講「我最鍾意聽R’nB同HipHop㗎」，不過一問佢鍾意邊個Artist，佢就話「郭富城囉」！
你問我哋想同邊個香港歌手合作？鄭少秋囉，佢真係好正又有型，講話想合作係認真㗎！
記：大碟首隻派台歌《Crazychildren》（亦係大碟名）源自MichaelLau，其實想講乜？
仁：Crazychildren本來係MichaelLau的Character，係講一種年輕人族群，佢哋留喺自己嘅世界，價值觀比較另類。
記：頭版大碟（8隻歌）送扭蛋，二版大碟10隻歌（無扭蛋）。點解要分兩版？我係你哋樂迷，又鍾意Michael，咁咪要買晒？
仁：因為首批印約20,000隻，Michael嘅Figure從來未做過咁大批，二萬隻對Michael嚟講已經係有史以來最多，賣晒就無扭蛋送，咪要出第二版。（咁官腔?!）
記：（一邊聽住、數住都係得8隻新歌）：老老實實，其實第二版嗰兩隻新歌做好未？
華：錄就錄好，不過後期就重爭啲……
1.燒鹹蟲—《圍威喂》
仁：「鹹濕歌一隻。」繼上次《𢫕春拳》大熱後，今次再下一城都係講嫖妓。
2.燒細路—〈Crazychildren〉
已經派台一陣子的一首。「歌曲有MichaelLauRap一段，又找來小朋友合唱，是新嘗試。」
3.燒（無禮貌）香港人—《我愛香港》
「想寫好耐，係講香港聲稱國際大城市，但香港人真係好無禮貌。」（此曲請來包以正彈結他）
4.燒香港隊—《好波》
「講吓賭波，又講吓香港隊點樣變成魚腩部隊。重有講到李健和係香港最『杰』球員，不過搞清楚係最『杰』，唔係最傑出噃。佢攞個波省球證，搞到被球證打，你話『杰』唔『杰』。」此曲由阿Paul（黃貫中）負責結他部份。
5.《夜晚上》
由阿華撰寫，比較慢板抒情的一隻。
＊6.燒香港樂壇—《樂壇班霸》
兩隻留待第二版才會推出之作品之一，聽歌名已係最激，唱嘅係香港樂壇，暫時未有得聽，期待。
＊7.燒某大國—《國際人渣》
仁：「關於911，持平啲講做國際警察嘅可能係另一種恐怖主義。觀點唔新，不過香港無音樂人做過。」
8.燒「型人」—《再見型過籠》
「唱啲以為自己好有型，但型過龍嘅『潮流人』。」
9.《對錯》（JoeyTang負責結他）
10.《債》
本來與葉德嫻合唱的那一首，今次改編後改由阿華主唱。
＊6,7兩隻新歌喺第二版才會收錄