港股5月份原本令人充滿憧憬，有機會升破萬二關，確認重展牛市升浪，可惜上星期二復市，標普調低地產股前景評級後，利淡消息接踵而來，加上美股嘅反彈亦同時見頂回落，搞到好友臨門一腳撻Q。
睇番轉頭，勝負之數其實只係一線之間，如果好友早發力些少攻破萬二關，止蝕盤推高恒指三幾百點並非無可能。噚日期指結算，恒指早市低見11268，250日線（現處11366）及50日線（現處11295）亦一度失守，最多跌過162點，但50日線始終有支持，期指結算大局已定後，恒指午市抽回11380收市，跌幅收窄至50點。
技術上，恒指調整未完，但噚日守在250日線之上收市，短期有機會先反彈，如果覺得大市未跌完嘅讀者，不妨考慮趙飛雲前日嘅策略，伺機買入恒指Put輪9049。
滙豐（005）噚日跌至94元支持位附近反彈，亦係令大市收窄跌幅嘅功臣。滙豐短期能否守穩94元，係恒指會否進一步下試11000嘅關鍵。長實（001）跌至3月開始嘅平行上升通道底部70.50元，估計守穩較跌穿機會大，可能係率先反彈嘅藍籌股。不過，如果確認跌穿，則港股前景更淡。
趙飛雲