我求大俠唔敢話英格蘭喺艾歷臣上任領隊之後，成績比之前好咗，但肯定比荷杜同基瑾時代健康得多，唔會再操啤，得閒淨係捉吓棋。
記得英格蘭喺兩年前嘅歐洲國國家盃，俾人影到佢哋喺架旅遊巴度玩啤，不知幾咁羞家。不過，自從艾歷臣接手成為佢哋領隊之後，班球員啲場內外操行都好咗好多，重由後衞蘇甘保帶頭玩國際象棋㖭！
係人都知捉棋係一項好考腦筋嘅遊戲，唔知班英格蘭球員捉得象棋多，喺禮拜日首場分組賽對瑞典嗰陣時，表現會唔會特別醒啲呢？
四年一度嘅世界盃咁大件事，我哋《蘋果日報》梗要做到最好，除咗推出即場賽果查詢熱線（26239888）不斷更新最新比數外，喺每日正午十二點至夜晚七點半，重有即日賽前速報（26239191），等讀者無論喺邊度都可以知道賽事最新資訊。
唔係個個美國運動員都係足球盲，好似女子網球手莎蓮娜咁就好鍾意足球，重着住件喀麥隆球衣比賽。雖則佢將美國球員高比鍾斯（Jones）講咗高比莊臣（Johnson），但起碼唔學似得阿加斯，連世界盃係乜都唔知。
咪以為名人就唔講大話，日前有個叫史施彭斯基嘅波蘭孤兒，就話波蘭足總主席列斯域斯應承過佢，如果波蘭出線世界盃，就帶佢去睇世界盃，點知最後就食言。列斯域斯你連孤兒都呃，小心有報應呀！
南韓球迷諗咗條橋對付啲足球流氓，就係見佢哋有乜風吹草動，就即刻報警；另外，佢哋諗住用人海戰術，如果見班足球流氓想搞事，就恃住自己友多，實行兇番佢哋轉頭。唔好話，呢招又真係幾絕喎！
厄瓜多爾雖然要到下個禮拜一先對意大利，但佢哋教練高美斯一早揚個陣出嚟，重話明踢「四五一」。但計我求大俠話，意大利班波經驗咁豐富，球員又咁醒，真係睬厄瓜多爾都儍，當高美斯講嘅嘢係耳邊風。