繼《全職殺手》同《瘦身男女》嘅劉德華ActionFigure之後，一直都有消息話會推出《愛君如夢》ActionFigure，但一直都係只聞樓梯響。不過前幾日發現呢批Figures喺旺角現身，小記當然率先同大家報道。除此之外，其他Figure、KUBRICK都有大量好嘢登場，各位玩具迷有福啦！
記者：張穎倫
攝影：周旭文
今次分別推出普通版同豪華禮服版兩款，兩個版本同樣會有Body一個、人頭兩個（微笑樣和正經樣各一款），而服飾方面，普通版會有啡色皮褸、牛仔褸、黑色西褲、迷彩綠長褲同波鞋一對，全套CasualWear任你換。豪華禮服版則會包金色舞衣、白色襯衣、黑色背心外套、大褸、長褲、音樂盒和舞者靈魂鞋，裝備非常齊全，另加送華仔簽名編號證書，全球限量1000個。劉華迷、Figure迷不容錯過。
無可否認今次嘅1:6劉德華Figure確實係最好嘅一批，除咗比例同面相比以前做得更似之外，服裝剪裁更係做到同真衫一模一樣，全部都係以戲中劉南生所穿嘅戲服為準，質素直逼大廠MEDICOM出嘅Figure。
兩個版本都會送齊微笑樣同正經樣，值得一讚係微笑樣連梨渦都做埋，笑得好溫柔，唔似某啲Figure，微笑變奸笑。
至抵死係兩個版本都送原大劉南生卡片一張，入面印滿「世界職業十項高級舞蹈教師文憑、英國國際舞蹈教師協會高級院士」等銜頭同南生近照一張，夠晒頂癮！
近排興番80年代嘅產品，順理成章當年威盡嘅《聖鬥士星矢》絕對出幾多搶幾多。啱啱勇闖香港嘅3.5吋扭蛋公仔，有齊星矢、紫龍、冰河、一輝、阿瞬五位主角，全部都以舊青銅聖衣造型製造。星矢、紫龍、一輝，更係各自打出「流星拳、昇龍霸、鳳翼天翔」等絕招動作，Fans必定鍾意。公仔面相同上色都非常之靚，特別係紫龍嘅長髮，以及阿瞬嘅星雲鎖鏈都做得好有心機，超越一般扭蛋嘅水準。
全套售價：$79（超人玩具）
小朋友鍾意、女朋友至冧嘅麵包超人，今次唔玩單人匹馬毛公仔，而改為一次過玩6位角色嘅得意扭蛋公仔。除咗有齊麵包超人、方包超人、咖哩包超人、霉菌小姐、細菌小子同三名手下，主要角色夠齊全之外，最過癮係每個公仔都有自己嘅座駕，跑車、飛碟，係人見到都想要。
全套售價：$89（超人玩具）
當你一眼睇到「柔術家、格鬥家、會社員、勞動者、部長、兄貴」呢6個騎呢KUBRICK積木，你可能未必覺得好勁，但其實佢哋同之前大炒特炒嘅「一番星BE@RBRICK」，都係嚟自HANAKUMAFACTORY設計系列，所謂系出名門，日本已經勁Hit，香港冇理由唔掂。最正係今次每款KUBRICK都採用不同包裝，唔使斷估，方便大家購買，抵讚！
每款售價：$30（宇宙船）
雖然好難明，但依然好多人鍾意嘅《新世紀福音戰士》，今次唔出EVA機，主打Q版人物匙扣，而且更一次過離開NERV組織，回到校園。一套5款，唔單止有真嗣、綾波麗、明日香和洞木光，呢批適齡學童着番校服，竟然連葛城姐姐都硬闖學校扮老師。每個人物都有不同表情，重有埋黑板、枱櫈等不同道具，不論帶出街抑或做擺設都咁過癮。
全套售價：$149（超人玩具）
同樣都喺80年代大熱嘅超時空要塞玩具，由於當年售價唔平，所以一推出復刻版，唔少大朋友都會買番架完成當年嘅心願。繼主角所揸嘅VF-1J同VF-1S之後，今次復刻第3彈輪到普通兵士用嘅VF-1A量產機，同樣採用1:55比例。雖然今次係頭頂只得一支機關槍嘅卒仔機，但唔少玩家都會買多幾架希望組成「阿波羅、魔鬼、天使」等機隊，銷量更拍得住主角機。
除咗機械人型嘅Battroid之外，今次仍然可作戰機型Fighter和步行型Gerwalk三段完全變形，唔使拆手變形，過程跟足動畫夠晒簡單。
售價：$335（宇宙船）
售賣點：
玩具狂熱（23884677）
旺角西洋菜街1N兆萬中心2樓217號舖
超人玩具（23662688）
旺角西洋菜街1N兆萬中心2樓222號舖
宇宙船（23902708）
旺角奶路臣街19號H地下