張達明近日跟好友合作，於下月推出一本《Yo!達明哥哥講笑話》兒童笑話集，培養小朋友有幽默感及創作潛能，達明更稱在講笑話過程中，至少可以令自己笑五次，非常超值。
張達明近日與港台DJ邵國華和一位精神科醫生朋友，一同製作一本名為《Yo！達明哥哥講笑話》的兒童笑話，並準備下月推出。由於他們三人都已為人父，因此對小朋友有一定了解。
張達明早前曾推出漫畫集，現推出兒童笑話，莫非他想把棟篤笑才華發揮在這本新書上？張達明日前在九龍塘接受訪問時說：「我睇過一啲兒童心理資料，話小朋友要多啲培養佢哋嘅幽默感，對發掘佢哋潛意識嘅創作能力好有幫助。」
問到這本兒童笑話集是否張達明自己創作，他說：「唔係，主要係我哋喺網上搜集嘅，好多笑話創作係佚名，所以我諗唔怕有版權啩。我會喺本書裏邊教家長喺乜嘢時候同小朋友講笑話最開心。」
張達明續說：「我覺得同人哋分享笑話，首先自己揀笑話時會笑一次，然後再搵個開心時刻同朋友講，講笑話前又搵個心情好嘅時候去演繹，到真係講笑話時自己會笑，朋友又會大笑，見到朋友開心，自己都開心，所以前前後後最少可以笑五次。」
張達明的兒子張子由不經不覺快四個月大，他說：「我平時返工時間比較彈性，所以可以有多啲時間對住BB，佢雖然得幾個月大，但平時我都會同佢講吓笑話，逗吓佢開心，見到佢笑得咭咭聲，我都會好開心。」張達明很喜歡小朋友，他計劃兩三年內便會為子由添個弟弟或妹妹。至於對子由有甚麼期望，他說：「我淨係希望BB好似佢個名咁自由開心。」
張達明為宣傳這本兒童笑話集，他日前即席繪畫了兩幅漫畫，充滿幽默感。
採訪：比華利