期指結算日，大市波濤洶湧，恒指由大跌161點，變為微跌50點收場，6月期指收市報11380，跌10點，平水。
個市氣氛唔多妥，睇淡者多過睇好者，股市往往鍾意搞搞反底遊戲，淡友最多嗰陣，就係跌市告終之時。
係時候搵啲彈跳力（同殺傷力）較勁嘅藍籌Call輪玩吓。
長實（001）兩個幾禮拜前宣布分拆長科上市，之後股價最高見77.75元，𠵱家調整至71元，回見上月中彈升嘅起步位，見底兼有超賣迹象，有機會出現技術性反彈。短炒長實Call輪，以成交取輪，例牌係9063；以數據取輪，則非9043莫屬。
9043昨收29.5仙，跌6.3%。8月到期，溢價8.2%，槓桿率24.1倍。昨日最低之時，見26仙，觸及上月低位，應已見底。
新地（016）再跌1元，交投好熱鬧嘅新地Put輪9119，只係由49仙微升上51仙。
隻淡友輪跟唔足正股變化，或意味正股已經跌夠，應該揀新地Call輪埋手，正路對象係隻9115。
章 盛