最近搞搬寫字樓，搞到一頭煙，俗語話，上屋搬下屋，唔見一籮穀，確係講得好啱。除咗搬運費用之外，新辦公室重要髹灰水、消毒清潔、換新傢俬……總而言之，幾萬銀走唔甩咯，而最弊嘅，就係每搬一次，就要時間清除文件、藏書（如年報），為免麻煩，丟得就丟，與過往幾年儲藏嘅歷史講拜拜，言之傷心，我哋啲小型企業，確實不宜多搬屋，無奈香港業主夠晒惡，我哋小企業毫無議價能力，惟有認命。
故紙堆中，執到一張九八年五月十號嘅「《明報》剪報」，講張子岱入選二十世紀亞洲最佳足球陣容。時值世界盃時刻，睇到呢段四年前舊新聞，不勝感慨。十一位亞洲最佳球員之中，左丁山睇過踢波嘅有仇志強（龍門）、蘇進安（中堅）、車範根、釜本邦茂（前鋒），其他的冇乜印象，呢個陣容係亞洲體育記者選出嚟嘅，差唔多全部係六七十年代球星，如果要拗，冇李惠堂、姚卓然、中田英壽，大家可以有排講。但令人難過嘅係張子岱之後，香港再無亞洲級球星，今日足球水準一落千丈，成為亞洲魚腩部隊，二十一世紀嘅亞洲足球陣容，你估再會唔會有香港人入選呢？發吓夢或者得嘅。
張子岱父親張金海，細佬張子慧，都係足球名將，張子岱嘅花名叫做「阿香」，一九五八年去英國踢甲組球會黑池，放棄咗代表「中華民國」參加羅馬奧運（一九六○年），佢勝在身材高大，腳法上乘，射門勁準，只可惜係玻璃頭，頭槌唔掂，今日香港啲前鋒中場球員，冇佢嘅五成功夫。