期指結算日，好友紛紛平倉，不過恒指已經由高位下調近600點，跌至噚日收市11380水平，現時先反手造淡，似乎又唔係好着數。不過，市場又對美國經濟復甦速度有懷疑，而且科技股又再被睇淡，港股調整之勢已成，大戶就算幾有實力，相信都唔會爬逆水造上。
光大國際（257）噚日急升9.59％，收報0.40元，成交亦增加至1397萬元。公司表示今年會落實收購環保科技業務。據黑客話，公司現時都幾手緊，傾緊配股集資，所以要做定準備工夫，聽講現價距離配售目標價，仍有一大段路要行。
據聞唔單止光國要配股集資，聽講連上實醫藥（8018）與航天科技（031）及航科通信（1185）亦計劃配股集資。其實近日航天科技及航科通信已開始發力，兩股噚日分別上升3.33％及9.1％。至於上實醫藥則由於收購行動陸續有來，配股集資當然係難免，此股噚日雖然回落1.15％，收報2.15元，但仍處於近期高位，雖然有長江生命科技上市熱潮支持，但相信好難再將股價大幅踢上嚟配股。
光通信（603）本周復牌後，股價表現一直硬朗，不過噚日就有少少腳軟迹象，收報0.209元，跌5.43％，成交金額減至1.07億元，先前接貨嘅經紀牌都有啲掉頭沽貨。不過，Cookie話，此股唔會咁快玩完，稍後可能會有好戲上演，雖然中油中泰投資計劃可能告終，不過重有幾個項目傾緊。
阿 虎