全城Pub：
銅鑼灣最大露天酒吧歡呼齊捧世界盃

萬人期待的世界盃今日正式揭幕，平日收工後喜歡落吧睇現場直播的你，在這個月簡直要在酒吧紮營，分秒昅實心水球隊，擊破對方重重防線，埋門抽射，「哇！入咗啦！」。球隊得分當然興奮，要是同場氣氛熱鬧，大家齊齊吶喊歡呼，感覺一定更High。今日就到銅鑼灣最大的露天酒吧視察環境，諗定中場休息時，點乜嘢好菜醫肚。

記者：楊一凡　
攝影：陳盛臣

薄餅$108
飲啤酒吹水睇波點少得的骰小食，看似好大塊的十吋薄餅，其實已橫三刀直兩刀切成十二塊FingerFood小吃，餡有四款供你選擇，燒汁雞肉芝士、蘑菇芝士、辣肉腸及菠蘿火腿煙肉，每個價錢$98至$108。

試味報告： 拍攝當日是菠蘿火腿煙肉薄餅，焗脆的煙肉已不再油膩，香脆得「咯咯聲」。

烤豬肋骨$95半條（後）
BBQ汁燒雞$95半隻（前）
烤豬肋骨可算是美式酒吧的例牌菜，好味與否全仗燒烤汁而定，店方在醬汁方面下了幾年工夫，所以肋骨醃十分鐘後，塗滿一身秘製醬汁便可入爐。而燒雞則以燒烤汁和啤酒醃三至四天，令肉質鬆軟。

試味報告： 肋骨軟腍，伴碟的椰菜甘笋沙律原來要一天時間醃製；燒雞不是皮脆但肉質頗滑，而且夠入味。

招牌雞沙律$78
霎眼看似日式芝麻炒飯的ISOSignatureChickenSalad是注入和風口味的沙律，材料有手撕雞、炸脆的日本蕎麥麵、青葱、生菜及甘笋，沙律汁是蛋黃醬加海鮮醬，撈勻後撒大量黑白芝麻點綴即可。

試味報告： 沙律帶點點酒香，雞肉口質頗滑，因為是手撕全隻雞，不似一般鬼佬沙律，只用嚡口的雞胸肉。

忌廉汁煮青口$135
澳洲青口正值時令，所以煮出來鮮味四溢，加上在炮製時先用蒜頭、雜菜、黑椒和牛油爆香，兜兩兜收乾水後，加白酒及忌廉，冚蓋等兩分鐘便可上碟。店方只選用最時令的貨源，遲些當法國青口進入肥美期，就會選用法國貨，總之要新鮮行頭。

試味報告： 青口鮮味，肉質軟熟，就連向來煙韌的青口邊，也變得鮮嫩可口；隨青口送薯條伴BBQ汁及蜜糖青芥辣醬。

豆腐煲$98
豆腐煲其實是豆瓣醬炒雜菜伴飯焦，全素登場。經過改良的豆瓣醬，不再一味得個鹹字，廚師加了西式香料，令豆瓣醬變得香口，清淡的配料如飯焦、番茄及豆腐等，經過新豆瓣醬點睛後，的確更加惹味。

試味報告： 飯焦令豆腐煲充滿焦香味，雜菜如番茄及洋葱等，跟豆瓣醬的味道很合得來。

啤酒園漢堡$100
認真製作的漢堡包，牛肉生熟度可由客人定；麵包要夠內軟，送到客人面前時，牛肉仍軟熟多汁；而煙肉、焦糖洋葱及洋葱圈等雖只作點綴，但一點也不馬虎。

試味報告： 這塊漢堡牛扒有半磅重，份量十足，這亦是其賣點所在，廚師在煎扒時避免擠壓，減少肉汁流失，所以肉扒不會乾身。

店名：INSIDEOUT
電話：28952900
地址：銅鑼灣希慎道9-11號新寧廣場地下
座位：約250個
營業時間：
星期一至四上午11時至凌晨1時，星期五、六及公眾假期上午9時至凌晨1時半。
付款方法：
現金及信用卡(A.E.,Diners,Master,Visa）