世界盃戰事已經如箭在弦，只待今晚法國對塞內加爾揭幕戰開波，大戰就會一觸即發。身為球迷的，不一定飛去日本韓國睇波，才感受到大戰氣氛，留在香港也可以。由今日開始至6月9日，Nike在鑽石山荷里活廣場內，搭建一個和廣告片中一模一樣的鐵籠進行超級球星比賽，其間更每日直播世界盃賽事；而場內並設有有獎問答遊戲，有機會攞走限量版Kubrick。既可睇波又可贏獎品，氣氛肯定夠晒熱血沸騰！
記者：周麗懿 攝影：陳智良
鐵籠賽由郵輪移師到荷里活廣場，比賽隊伍方面，除了由香港甲組球星組成8支超級明星隊之外，亦有來自青少年組和公開組各組別的參加者。比賽以3打3形式進行，時間以3分鐘為限，以鬥快入球來定勝負。日前就有陳志光、陳志康、羅繼華，及楊正光、譚偉國及陳家麒分成兩隊，作示範表演賽，兩隊球員都採取全場緊逼的踢法，更不時利用鐵絲網交波給隊友，「澎澎」聲此起彼落，相信到真正埋牙會更加緊張刺激。
整個會場布置甚有氣勢，走進足球形的門口，就是通往神秘鐵籠賽的場地。
鐵籠賽採用5號足球，要鬥快將波射入只有2呎高、3呎闊的龍門，的確很考腳法。
鐵籠場地和廣告片段幾乎一模一樣，長闊高為20×10×3米，只欠鐵籠頂上，簡東拿放球的位置。想睇波的朋友，就可圍住場地，隔着鐵絲網近距離感受鐵籠賽的刺激氣氛。
儲開Kubrick的朋友又或者超級球迷，一定對這套有齊中田英壽、費高和亨利的Kubrick恨到流口水，據悉此套Kubrick在日本已經炒到幾千蚊！現在只要親身到場參加有獎問答遊戲，就有機會免費攞走。每日場內都會展示當日的問題，只要將填好答案和個人資料的遊戲券放進抽獎箱，答對而又被抽中的幸運兒，就有機會得到一套。遊戲每日分三個時段，分別為下午3時、下午5時及下午7時，即是每日都有三次機會，若然你志在必得，就要每日都要嚟嘞！
另外，由5月31日至6月9日期間，在鐵籠場地內設置一巨型銀幕（17呎×13呎），每日播放最後兩場世界盃賽事（5月31日直播揭幕戰），場內最多可容納220人，入場時間為每場賽事開波前約30分鐘。想同二百幾人一齊叫餐飽，就先要即場登記成為Nike神秘聯賽會員，取得密碼即可進場，不過要留意入場密碼經常更新，有心日日去捧場的朋友，就要每日Check好電郵先至好出發嘞！
無緣參加鐵籠賽，但又想試試在鐵籠內踢波的感受，就要試試場內兩個特設的足球遊戲，其中一個「蠍子挑戰」的遊戲，每隊需要有3名成員作賽，場區以一塊布滿一個個大小不一的「窿窿」木板分隔，每邊場區均有15個足球，在一分鐘的時間內，鬥快將足球踢去對面場區，完場時以最少足球的一方為勝利者，勝方每人都可得到蠍子鎖匙扣，而任何一隊可連續勝出5場，更可獲得神秘禮品一份。
場內亦在兩個足球產品攤位，擺放了最新的足球產品，包括足球、最新國家隊球衣、練習球衣，以及波鞋等等，雖然有不少斷貨產品，但可惜攤位不設零售，想買就要去運動服舖頭碰運氣。
日期：5月31日至6月9日
地點：鑽石山荷里活廣場明星廣場
開放時間：周末（上午10時至下午10時）、星期一至五（中午12時至下午10時）
世界盃席捲全城，想攞套紀念品來留念？各路球迷同Kubrick迷就要留心嘞！《蘋果日報》和NIKEHONGKONGLTD.合辦有獎問答遊戲，答中而又被抽中的幸運兒，就有機會得到限量版Nike中田英壽、費高及亨利Kubrick一套（連盒），其他的獎品就包括有Nike球星海報及葡萄牙國家隊球衣，想攞走獎品？咁就要留心以下問題嘞！
問題：三隻Kubrick來自Nike神秘聯賽內哪些隊伍呢？
貼士：嗱嗱聲上Nike網睇啦！
參加辦法：
1.參加者須將答案填妥在《蘋果日報》內的參加表格，並將已填好的個人資料貼在信封背面，寄去香港九龍觀塘觀塘道388號創紀之城渣打中心37樓 NIKEHONGKONGLTD.收。
2.頭8名幸運兒，各獲得一套Kubrick（連盒），次3名各可獲得葡萄牙國家隊球衣一件，其後20名中獎者則可獲得Nike24位球星海報一張。
3.遊戲由即日起至6月2日（以郵戳為準），答案正確的參加者均有機會得獎。
4.每人只限參加一次。
5.遊戲將以抽籤儀式進行，得獎者將會個別通知。
6.為公平起見，《蘋果日報》及Nike員工、家屬不得參加是次遊戲。
7.所有獎品之提供由Nike負責，一切轇轕與《蘋果日報》無關。