大市再跌，250日線（11366）有支持，收市險守其上。恒指一度跌至11268，午後期指結算大局底定，跌幅收窄，收市報11380，跌50點，成交再增至97億元。6月期指大部份時間高水，但尾市又轉為平水。
上月底，5月期指企於11360水平，噚日期指以11327結算，好淡勝負未分，並已將「戰線」延至6月，市場消息指基金仍多轉好倉，且看6月會否再有一個高潮。
多家公司抽水，股價普遍下跌，首長系雖否認快有注資重組行動，但股價照升不誤，首長科技（521）升勢不停，再有6仙進帳，一向睇「低」呢系股票，今次走咗寶。
筆者看好生科股，下半年應有一個大升浪，但港股中，真真正正係有生科概念嘅股份，嚴格來說並不多，大成生化（809）、高寶綠色（274）同生命科技（1180）算係其中較突出者。大成和高寶噚日都能逆市而升，生科則微跌1個位。
高寶噚日在上海有一個大騷，正式推出MojorieBertagne（MB）護膚產品，由於有鞏俐同陳慧琳做代言人，今次進軍內地市場，已收先聲奪人之效，下一步已計劃8月在北京進行推介。
MB只係高寶旗下的一項業務，高寶主力的生化科技項目，成功研發的污水處理系統同工業酵素酶已開始作商業化發展，其他如分子生物和蛋白淨化的研發，亦已進入最後階段。
高寶上升潛力極大，係中線投資理想對象，以半年為期，股價可見3.0元。
康健國際（8138）收28.5仙，升2仙，成交1.5億股，少見的墟冚場面，大盤吸納頗勁。消息指有大公司會同康健合作，增持普斯基因權益（現持有25%），然後分拆上市。至於內地機構有意入股，聽聞情況有變，唔排除會成間「買起」。本欄早前推介時股價22仙，「上車」者可續持有，以25仙為止賺位，目標35仙。
郭兆誠