近期實在太多股份抽水，除咗部份股仔如日前推介嘅利豐雅高（623），因有人繼續密密收貨，仍然升緊之外，其他股仔都係升一日跌一日，想炒短線搵錢一啲都唔容易。
好似祥泰行（199）咁，由殼王前度馬仔做大股東，由於早排光通信（603）一役炒得漂亮，所以經紀黃都提過，市場揣測佢會跟風炒作。
祥泰行果然在本周初宣布配股，以每股10仙，配售3.9億股新股。雖然經紀黃收足料，聽到新股係1股都冇出街，但唔知點解，隻股由復牌以來，股價一路係咁跌，好似噚日又跌9.1%，收9仙，跌穿10仙批股價，經紀黃話諗極都唔明。
收尾佢周圍問人，原來祥泰行一直有個隱形大戶坐咗好多貨，經過今次配售後，股權被大幅攤薄，佢覺得橫掂都係輸，不如趁早沽貨走人，所以隻股沽壓大。經紀黃話，配股只係前奏，稍後會有消息跟尾。
慕容小初